Laxaverðið lækkar enn

Verð á laxi lækkaði lítillega á erlendum mörkuðum í síðustu viku, fjórðu vikuna í röð. Verð á ferskum útfluttum laxi frá Noregi var 15 prósentum lægra í síðustu viku miðað við verðið í lok júní en þá náði það hámarki.

Greiningardeild Glitnis segir í Morgunkorni sínu að Norðmenn séu stærstu einstöku framleiðendur á eldislaxi í heiminum og því sé útflutningsverðið frá Noregi lýsandi fyrir heimsmarkaðsverð á laxi.

Þótt meðalverð á laxi hafi lækkað síðustu vikur er það enn mjög hátt í sögulegu ljósi og mjög ásættanlegt fyrir framleiðendur, að sögn deildarinnar.

Þá segir ennfremur í Morgunkorninu að afkoma laxeldisfyrirtækja í Noregi hafi verið mjög góð og bendi spár til að svo verði í ár. Spái flestir því að verðið lækki frekar á seinni hluta þessa árs og á næsta ári vegna aukins framboðs.

Verðlækkun á laxi kemur sér vel fyrir fullvinnslufyrirtæki, að sögn deildarinnar en Alfesca er eitt af þeim fyrirtækjum sem finna fyrir verðbreytingum á laxaafurðum þar sem dótturfyrirtæki þess, Labeyrie, Delpierre og Vensy eru stórir kaupendur á laxi, m.a. frá Noregi.