Detroit vann Miðriðilinn

Detroit Pistons tryggði sér í nótt sigur í Miðriðlinum í Austurdeildinni þegar liðið skellti Atlanta Hawks 91-84 á heimavelli sínum, en ekkert lið getur nú náð Pistons á toppi riðilsins þó enn sé talsvert eftir af tímabilinu. Rasheed Wallace skoraði 26 stig fyrir Detroit, en Al Harrington skoraði 23 stig fyrir Atlanta.

LA Lakers lagði Boston 105-97 á útivelli. Kobe Bryant skoraði 43 stig fyrir Lakers en Paul Pierce skoraði 26 stig fyrir Boston.

LA Clippers lagði Houston á útivelli 99-91. Sam Cassell skoraði 24 stig fyrir Clippers en Yao Ming skoraði 25 stig og hirti 17 fráköst fyrir Houston.

Þá vann Milwaukee góðan útisigur á Portland 100-93. Zach Randolph skoraði 23 stig fyrir Portland, en Michael Redd skoraði 23 stig fyrir Milwaukee og TJ Ford skoraði 19 stig og átti 10 stoðsendingar.