Olíuverð hækkaði fyrir fund OPEC-ríkja

Heimsmarkaðsverð á hráolíu hækkaði lítillega á helstu fjármálamörkuðum í dag. Ástæðan er fundur OPEC, samtaka olíuútflutningsríkja, síðar í dag en þar verður tekin ákvörðun um það hvort dregið verði úr olíuframleiðslu aðildarríkjanna til að sporna gegn verðlækkunum á hráolíu. Þá dró úr olíubirgðum í Bandaríkjunum.

OPEC ákvað að skerða olíuframleiðslu um 1,2 milljónir tunna á dag frá og með 1. nóvember síðastliðnum. Einhugur var ekki um samdráttinn og hafa einungis sárafá aðildarríki samþykkt að draga úr framleiðslu sinni.

Breska ríkisútvarpið bendir á, að þótt nokkur aðildarríki vilji frekari samdrátt um áramótin þá sé ekki samstaða um málið.

Hráolíuverð hækkaði um 19 sent á markaði í New York í Bandaríkjunum í dag og fór í 61,56 dali á tunnu en verð á Norðursjávarolíu hækkaði einungis um 7 sent og fór í 61,80 dali á tunnu á markaði í Lundúnum í Bretlandi.

Í vikulegri skýrslu bandaríska orkumálaráðuneytisins, sem birt var í gær, kemur fram að olíubirgðir í Bandaríkjunum hafi minnkað meira á milli vikna en búist var við. Almennt var gert ráð fyrir að olíubirgðir hefðu dregist saman um 600 þúsund tunnur en reyndin varð önnur, eða 4,3 milljónir tunna.