Heildarvirði krónubréfaútgáfu orðið 240 milljarðar

Heildarvirði erlendra krónubréfaútgáfu er orðið um 240 milljarðar króna frá því hún hófst fyrir tæpu ári. Þingmaður Samfylkingarinnar varar við óvissunni sem þessu fylgir. Um 60 milljarðar króna eru á gjalddaga frá ágústmánuði til næstu áramóta.

Kristján L. Möller, þingmaður Samfylkingarinnar, lagði fram fyrirspurn á Alþingi í vor um útgefin skuldabréf í íslenskum krónum, eða svokölluð krónubréf, frá því í í ágúst í fyrra þegar útgáfan hófst til 10. apríl á þessu ári. Í svari þáverandi forsætisráðherra, Halldórs Ásgrímssonar, kom meðal annars fram að heildarnafnverð bréfanna væri 226 komma sex milljarðar króna og útgefendurnir væru fyrst og fremst evrópskar fjármálastofnanir.

Þýski landbúnaðarsjóðurinn er stórtækastur í þessum efnum en með krónubréfaútgáfu hans í gær, upp á 9 milljarða króna, er heildarnefnverð bréfa hans orðið rúmlega 60 milljarðar króna. Næst stærsti útgefandinn er Fjárfestingabanki Evrópu með bréf upp á röska fjörutíu milljarða króna, en þar á eftir kemur Rabo-bank í Hollandi, austurríska ríkið og Deutsche bank. Heildarupphæðin nemur nú um 240 milljörðum króna. Kristján telur þetta varhugavert því ekkert sé vitað á þessari stundu hvort þetta sé til góðs eða ills.

Og Kristján bendir á að háar upphæðir eru á gjalddaga á allra næstu mánuðum. Um 60 milljarða króna er nefnilega um að ræða frá ágústmánuði til næstu áramóta.