Lítil fjölgun starfa í Bandaríkjunum

Fjölgun starfa í Bandaríkjunum í síðasta mánuði var sú minnsta í 7 mánuði auk þess sem dró úr launahækkunum á sama tíma. Hvort tveggja var undir væntingum markaðsaðila og hefur í kjölfarið dregið úr verðbólguvæntingum . Þá eru horfur á að stýrivaxtahækkanir séu á næsta leiti í Bandaríkjunum.

Í hálf fimm fréttum greiningardeildar KB banka segir að úr framvirkum samningum megi lesa að innan við helmings líkur séu á vaxtahækkun bandaríska seðlabankans í júlí miðað við 70 prósenta líkur í gær. Merki þess sáust á gjaldeyrismörkuðum og féll gengi dollars gagnvart evru um næstum eitt prósentustig í dag.

Þá birtust í dag jákvæðar tölur um stöðu á bandarískum vinnumarkaði. Atvinnuleysi lækkaði um 0,1 prósent í 4,6 prósent og hefur atvinnuleysi ekki mælst minna síðan í júlí 2001. Hagvöxtur á fyrsta ársfjórðungs í Bandaríkjunum var töluverður og samsvaraði 5,3 prósenta á ársgrundvelli. Hinsvegar er búist við að hagkerfið vaxi minna, eða um 3-3,5 prósentum yfir næstu ársfjórðunga. Af þeim sökum gera hagfræðingar ráð fyrir að heldur dragi úr ráðningum á næstunni, að sögn greiningardeildarinnar.