Tap hjá Smáralind

Smáralind ehf., rekstraraðili verslunarmiðstöðvarinnar Smáralind í Kópavogi, tapaði 733 milljónum króna á fyrri helmingi ársins. Á sama tíma fyrir ári tapaði félagið 36 milljónum króna. Tapið skýrist fyrst og fremst af gengistapi af erlendum skuldum félagsins sem nam 652 milljónum króna. Búist er við að breytingar á gengi krónunnar hafi áfram mikil áhrif á afkomu fyrirtækisins.

Í tilkynningu frá félaginu til Kauphallar Íslands kemur fram að hagnaður fyrir afskriftir og fjármagnsliði (EBITDA) hafi numið 362 milljónum króna samanborið við 337 milljónir króna á sama tímabili í fyrra.

Veltufé frá rekstri á tímabilinu nam 250 milljónum króna en var 191 milljón króna í fyrra. Í lok tímabilsins var eiginfjárhlutfallið tæplega 39 prósent að teknu tilliti til víkjandi láns frá móðurfélaginu.

Í tilkynningunni kemur fram að heildartekjur Smáralindar ehf. á tímabilinu hafi numið 654 milljónum króna. Þar af hafi leigutekjur numið 507 milljónum króna, sem er 11 prósenta hækkun frá sama tímabili í fyrra. Rekstrargjöld án afskrifta voru 292 milljónir króna samanborið við 267 milljónir fyrir ári en afskriftir námu 187 milljónum króna. Þá voru fjármagnsliðir neikvæðir um tæpa 1,2 milljarða króna en á sama tímabili í fyrra voru þeir neikvæðir um 209 milljónir króna.

Gengistap félagsins á tímabilinu nam 652 mkr. en í lok ágúst hafði það minnkað um 300 mkr. vegna styrkingar krónunnar.

Heildareignir Smáralindar ehf. í lok júní námu 10 milljörðum króna en þar af nam bókfært verð verslunarmiðstöðvarinnar Smáralindar rúmum 9,4 milljörðum króna.

Eigið fé nam 1 milljarði króna í júnílok og víkjandi lán frá móðurfélaginu námu tæpum 2,9 milljörðum króna. Samtals námu víkjandi lán og eigið fé því rúmum 3,9 milljörðum króna í lok tímabilsins.

Heildarvelta verslana og þjónustuaðila í verslunarmiðstöðinni jókst um rúm 13 prósent á fyrstu 6 mánuðum ársins miðað við sama tíma árið áður. Þá jókst gestafjöldinn á fyrri helmingi ársins um 8%.

Mikil eftirspurn er eftir húsnæði í Smáralind og hefur leiguverð stöðugt haldið áfram að hækka.

Gert er ráð fyrir að tekjur félagsins á síðari hluta ársins verði ívið hærri en á fyrri hluta árs, m.a. vegna fleiri leigusamninga og áhrifa veltutengdra leigusamninga. Horfur séu því á að afkoma af rekstri félagsins fyrir fjármagnsliði (EBITDA) batni enn á síðari hluta ársins en ljóst að breytingar á gengi íslensku krónunnar munu eins og áður hafa mikil áhrif á rekstrarniðurstöðu ársins.