Sony innkallar eigin rafhlöður

Japanska hátæknifyrirtækið Sony hefur ákveðið að innkalla 90.000 rafhlöður, sem fyrirtækið framleiðir og selur með fartölvum af gerðinni Sony Vaio. Tæknifyrirtækið reiknaði með 43 prósenta minni hagnaði á árinu í júlí. Þá voru innkallanirnar ekki byrjaðar og reikna greiningaraðilar með enn minni hagnaði.

Ekki er þó um innköllun á heimsvísu að ræða því tölvurnar voru seldar í Japan og Kína.

Gallinn í rafhlöðunum er sá sami og í fyrri tilvikum. Rafhlöðurnar ofhitna og er vitað um 10 tilvik þar sem beinlínis hefur kviknað í fartölvum vegna þessa. Breska dagblaðið The Guardian hefur eftir japanska viðskiptablaðinu Nihon Keizai Shimbun að svo gæti farið að Sony innkalli allt að 300.000 rafhlöður sem seldar voru með Sony Vaio fartölvum.

Forsvarsmenn Sony segja hins vegar að innköllunin sé gerð í varúðarskyni og til að róa viðskiptavini fyrirtækisins.

Frá og með þessari innköllun hefur Sony ákveðið að innkalla ríflega 8 milljón rafhlöður undir merkjum fyrirtækisins um allan heim.

Þá hefur það áhrif á afkomuspá Sony að fyrirtækið lækkaði verðið á nýjustu leikjatölvu fyrirtækisins, PlayStation 3, um heil 20 prósent. Í afkomuspá Sony sem gerð var í júlí síðastliðnum var gert ráð fyrir 130 milljarða jena eða tæplega 40 milljarða króna hagnaði á árinu. Þetta er 43 prósentum minna en í fyrra. Greiningaraðilar telja líkur á að hagnaðurinn verði enn minni þegar innkallanir á ríflega 8 milljónum rafhlaða verði komnar inn í dæmið.