Ég vil alls ekki fara frá Barcelona

Ronaldinho hefur verið orðaður við metsölu til AC Milan á Ítalíu undanfarnar vikur. Fjölmiðlar héldu því fram að Mílanó­liðið væri tilbúið til að borga 85 milljónir punda fyrir brasilíska töframanninn sem er samningsbundinn Barcelona til ársins 2014. Þrátt fyrir að vera upp með sér yfir áhuga Milan segir Ronaldinho að hann sé ánægður hjá Barcelona og vilji ekki fyrir nokkra muni yfirgefa félagið.

"FC Barcelona er hinn fullkomni staður fyrir mig og ekkert hefur breyst. Ég er ótrúlega ánægður hérna og ég er ekki að einbeita mér að neinu öðru en að spila fyrir félagið. Ég er fullkomlega rólegur yfir þessu, ég veit ekki hvort einhver hefur verið í sambandi við bróður minn yfir þessu en það er alltaf gaman að heyra að því að stórklúbbar hafi áhuga á manni og dáist að manni. Svona hlutir hvetja mig til að leggja enn harðar að mér," sagði Ronaldinho en bróðir hans er einnig umboðsmaður hans.

Eftir að hafa unnið Meistaradeildina og spænska meistaratitilinn, auk þess að vera útnefndur besti leikmaður heims, allt á síðasta tímabili, er Ronaldinho sannfærður um að annað tímabil velgengni fari senn í hönd. "Við erum með sterkt lið og höfum bætt frábærum mönnum við hópinn, ég er viss um að velgengi okkar mun halda áfram," sagði Ronaldinho og átti þá við Eið Smára Guðjohnsen, Gianluca Zambrotta og Lilian Thuram sem keyptir hafa verið í sumar.