Ölvaður engill

Extrablaðið danska hefur farið mikinn í sérkennilegri greiningu á íslensku viðskiptalífi. Umfjöllun blaðsins er reyndar með eindæmum þunn og ómerkileg, en getur skaðað þá sem fyrir henni verða. Ritstjóri Extrablaðsins heitir Hans Engell og er fyrrverandi formaður danskra íhaldsmanna. Pólitískur ferill hans fékk snöggan endi eftir að hann keyrði á fullur og missti ökuréttindi og féll af háum stalli. Danir geta verið fyndnir og skemmtilega meinfýsnir, en brandarinn sem gekk í kjölfar ölvunarakstursins hljómaði svona. "Vår Herre körer ikke berused. Det gör hans engel."