Spá talsverðri lækkun á verðbólgu

Útlit er fyrir 0,8 prósenta hækkun vísitölu neysluverðs milli ágúst og september og allt bendir til þess að verðbólga hafi þegar náð hámarki og muni minnka á næstu mánuðum. Þetta kemur fram í endurskoðaðri verðbólguspá Greiningardeildar Glitnis.

Í Morgunkorni Glitnis segir að eldsneytisverð hafi lækkað að undanförnu og geti lækkað frekar á næstu dögum í ljósi gengishækkunar krónunnar og lækkunar á heimsmarkaðsverði. Útsölur séu nú að ganga til baka en reiknað er með minni áhrifum á vísitöluna en í fyrra. Tiltæk gögn bendi hins vegar til þess að íbúðakostnaður muni reynast hærri en í síðasta mánuði.

Hagstofan birtir vísitölu neysluverðs þann 12. september. Gangi spá Greiningardeildar Glitnis eftir mun verðbólga lækka talsvert, úr 8,6 prósentum í 7,8 prósent.