Ný flugslysaáætlun fyrir Keflavíkurflugvöll undirrituð

Forsvarsmenn almannavarna á Keflavíkurflugvelli og ríkislögreglustjóri undirrituðu í dag nýja og endurskoðaða flugslysaáætlun fyrir Keflavíkurflugvöll.

Áætlunin segir fyrir um skipulag og stjórnun aðgerða í kjölfar flugslyss á Keflavíkurflugvelli eða annars staðar á Reykjanesskaga en hana unnu almannavarnadeild Ríkislögreglustjóra, lögreglustjórarnir á Keflavíkurflugvelli og í Keflavík, almannavarnanefndir Keflavíkurflugvallar, á Suðurnesjum og í Grindavík ásamt flugvallarstjóranum á Keflavíkurflugvelli.

Virkjun er tvískipt, annarsvegar þegar um er að ræða flugvél með níu manns eða færri eru um borð og hins vegar þegar tíu eða fleiri eru um borð. Einnig er mögulegt að virkja áætlunina á hærra stiginu ef farmur flugvélar getur hugsanlega valdið almannahættu þó svo að níu manns eða færri séu um borð.

Flugvallarstjórinn á Keflavíkurflugvelli hefur umsjón með reglubundnum æfingum tengdum áætluninni en allir þættir hennar skulu að minnsta kosti æfðir á tveggja ára fresti í samvinnu við aðgerðastjórn og almannavarnadeild ríkislögreglustjóra.