Airbus fyrir FedEx

Frederick Smith, forstjóri bandarísku póstflutningaþjónustunnar FedEx, sagði í samtali við franska viðskiptablaðið Les Echos í byrjun vikunnar, að fyrirtækið hefði enn hug á að kaupa A380 fraktflugvélar frá evrópsku flugvélaverksmiðjunum Airbus.

Smith greindi ekki nákvæmlega frá því hversu margar vélar fyrirtækið myndi kaupa.

FedEx afpantaði nýverið tíu fragtflugvélar af sömu gerð frá Airbus og sagði Smith, að það hefði verið gert til að létta undir með EADS, móðurfélagi Airbus, sem greint hefur frá töfum á afhendingu vélanna.