Alfesca ofar vonum

Afkoma Alfesca á fyrsta fjórðungi reikningsárs síns var neikvæð um 1,8 milljónir evra, sem svarar til 161,6 milljóna íslenskra króna. Er það nokkuð betri afkoma en meðaltalsspá greiningardeilda bankanna sem hljóðaði upp á um 215 milljóna króna tap.

Í tilkynningu frá Alfesca kemur fram að sala á öllum meginmarkaðssvæðum, í Frakklandi, í Bretlandi og á Spáni, sem og í öllum afurðaflokkum, hafi verið góð á fjórðungnum. Nam hún um 112 milljónum evra, sem nemur rúmum 10 milljörðum króna. Söluaukningin nemur því 6,7 prósentum. Á kynningarfundi uppgjörsins í gær benti Xavier Govare, forstjóri Alfesca, á að sé litið til þriggja af fjórum megin afurðaflokkum Alfesca nemur aukningin 17 prósentum milli ára.

Rekstur Alfesca hefur litast mjög af háu afurðaverði á laxi, sem náði sögulegu hámarki á fjórðungnum. Það hefur lækkað og virðist vera að ná jafnvægi og er það fyrirtækinu, sem nú er að ganga inn í mikilvægasta fjórðung ársins, afar mikilvægt.