Inter skaust á toppinn

Ítalíumeistararnir í Inter unnu 4-3 sigur á Chievo í gær í ótrúlegum leik á heimavelli sínum. Með þessum sigri komst Inter á toppinn en það munaði litlu að liðið glopraði niður forskoti sínu eftir að hafa komist í 4-0. Á seinasta stundarfjórðungi leiksins skoraði Chievo þrjú mörk og fékk færi í viðbótartíma til að ná jafntefli.

Hernan Crespo skoraði tvö mörk fyrir Inter í gær en Walter Samuel og Dejan Stankovic skoruðu hin mörkin. Roma var í hörkustuði gegn Parma og vann 4-0 útisigur. Vincenzo Montella, Simone Perrotta, Aleandro Rosi og Alberto Aquilani skoruðu mörkin.