Meiri vandræði hjá Dell

Bandaríski tölvuframleiðandinn Dell hefur frestað útgáfu á afkomutölum fyrirtæksins fyrir annan fjórðung ársins. Ástæðan er athugasemdir sem bandaríska fjármálaeftirlitið (SEC) gerði við bókhald fyrirtækisins síðastliðin fjögur ár.

Að sögn Michaels Dell, stjórnarformanns og stofnanda Dell, vinnur fyrirtækið með fjármálaeftirlitinu og eru stjórnendur tilbúnir að gera allt sem í þeirra valdi stendur til að svara öllum athugasemdum eftirlitsins fljótt og örugglega.

Michael Dell sagðist ekki geta sagt fyrir um hvað rannsókn fjármálaeftirlitsins þýddi fyrir fyrirtækið en stefnt væri að því að kynna uppgjörið eins fljótt og auðið væri.

Athugasemdir fjármálaeftirlitsins auka enn á vandræðasúpu tölvuframleiðandans en í síðasta mánuði þurfti fyrirtækið í varúðarskyni að innkalla fjórar milljónir rafhlaða frá Sony sem voru í fartölvum fyrirtækisins. Var það einhver mesta innköllun á tölvubúnaði fram til þessa.

Gengi bréfa í Dell hefur ekki farið varhluta af vandræðunum en það féll um 3,7 prósent á markaði vestra í kjölfar fréttanna á mánudag og stendur nú í 20,85 dölum á hlut.