Hærri stýrivextir á evrusvæðinu

Evrópski seðlabankinn segir í mánaðarlegu fréttabréfi sínu, sem kom út í dag, að hann fylgist náið með verðbólguþróun á evrusvæðinu og segir mikla hækkun stýrivaxta í vændum til að halda aftur af verðbólgudrauginum. Þetta er samhljóða því sem Jean-Claude Trichet, bankastjóri evrópska seðlabankans, sagði þegar hann greindi var frá því í síðustu viku að vextir bankans yrðu óbreyttir í júlí.

Hagfræðingar eru margir á einu máli um að seðlabankinn tilkynni um hækkun stýrivaxta að loknum vaxtaákvörðunarfundi sínum í byrjun næsta mánaðar.

Stýrivextir á evrusvæðinu eru 2,75 prósent en bankinn hefur hækkað þá þrisvar sinnum um 25 punkta í hvert skipti á síðastliðnum átta mánuðum.

Verðbólga á evrusvæðinu mælist nú 2,5 prósent en evrópski seðlabankinn spáir 0,5 prósentustiga lækkun á seinni hluta ársins og býst við að verðbólgan standi í 2 prósentum út næsta ár.