Þrýst á hærri vexti

Mervyn King, seðlabankastjóri Englands, sagði á fundi með breskum þingmönnum í Bretlandi á fimmtudag að hættan sem stafar af verðbólguhækkunum á heimsvísu hafi skapað óvissu í efnahagslífi margra landa.

King sagði seðlabanka víða um heim undir þrýstingi að hækka stýrivexti en bætti við að Ben Bernanke, kollegi hans í Bandaríkjunum, væri í sérstaklega erfiðri stöðu þar sem verðbólga hefði aukist þar í landi þrátt fyrir minni eftirspurn á innanlandsmarkaði.

Seðlabanki Bandaríkjanna hækkaði stýrivexti um 25 punkta í fyrradag og standa þeir nú í 5,25 prósentum. Þetta er 17. stýrivaxtahækkunin í Bandaríkjunum en Bernanke gaf í skyn að hækkanaferlið yrði senn á enda.

Fjármálasérfræðingar spá sömuleiðis hækkun stýrivaxta í Japan um miðjan næsta mánuð en stýrivextir þar í landi hafa staðið í 0 prósentum síðastliðin fimm ár. Toshihiko Fukui, seðlabankastjóri Japans, segir hins vegar að bankinn muni ekki hækka stýrivexti fyrr en í fyrsta lagi í ágúst eða september.

Fátt bendir til að Englandsbanki hækki stýrivexti sína á næstunni, sem hafa staðið í 4,5 prósentum í 10 mánuði.