Áfrýja banni Zlatans

Ítalska knattspyrnufélagið Juventus ætlar að áfrýja úrskurði aganefndar ítalska knattspyrnusambandsins sem dæmdi sænska sóknarmanninn hjá Juventus, Zlatan Ibrahimovic, í þriggja leikja bann. Aganefndin studdist við myndbandsupptöku en forseti Juventus, Luciano Moggi, dregur réttmæti upptökunar í efa. Ibrahimovic á að hafa gefið Ivan Cordoba, varnarmanni Internazionale, olnbogaskot. Þessa atviks var ekki getið í skýrslu frá dómara, aðeins í umsögn fréttamanna um leikinn. Forystumenn Juventus vilja fá að vita hvaðan myndbandið sem aganefndin studdist við sé komið.