KredittBanken kaupir norskt félag

KredittBanken, dótturfélag Íslandsbanka í Noregi, hefur vilyrði fyrir yfir 50% af hlutabréfum í fjármálafyrirtækinu FactoNor og mun í framhaldinu gera tilboð í öll hlutabréf í félaginu. Þetta kemur fram í tilkynningu frá Íslandsbanka. FactoNor er eins og KredittBanken staðsett í Álasundi og sérhæfir sig í veltufjármögnun og kröfukaupum fyrir smá og miðlungsstór fyrirtæki í norðvesturhluta Noregs. FactoNor velti um 2,8 milljörðun norskra króna, um 28 milljörðum íslenskra króna, í kröfukaupum árið 2004. Þá var vöxtur þess var 19% frá árinu áður. Markaðshlutdeild á landsvísu var 4% árið 2004 en markaðshlutdeildin í norðvesturhluta landsins er mun meiri, segir í tilkynningunni. Góð afkoma hefur verið á rekstri FactoNor undanfarin ár og árið 2004 var hagnaður fyrir skatta um 4,6 milljónir norskra króna, um 46 milljónir ísl. króna. Miðað við það verð sem KredittBanken býður hluthöfum þá er virði fyrirtækisins um 52,8 milljónir norskra króna, um 528 milljónir ísl. króna. Til þess að kaup KredittBanken á FactoNor gangi endanlega í gegn þarf samþykki norskra yfirvalda.