Mido vill fara til Spurs

Framherjinn Mido, sem verið hefur í láni hjá Tottenham Hotspurs frá Roma síðan í janúar í fyrra, segir að hann vilji ganga formlega í raðir Lundúnaliðsins þegar leiktíðinni lýkur í vor. Mido hafði verið hjá nokkrum liðum og þótti nokkur vandræðagemlingur. Hann byrjaði nokkuð vel með enska liðinu og hefur nú náð að festa sig í sessi í liði Martin Jol. "Tottenham hefur áhuga á að ganga frá kaupum á mér og það er ekkert því til fyrirstöðu vegna ákvæðis í lánssamningnum mínum. Ég get orðið leikmaður Tottenham fyrir fjórar og hálfa milljón punda," sagði Egyptinn.