Tveir taka við af Sigurði

Ragnhildur Geirsdóttir, 33 ára verkfræðingur, var í dag ráðin forstjóri Flugleiða. Þá var Jón Karl Ólafsson, framkvæmdastjóri Flugfélags Íslands, ráðinn forstjóri dótturfélagsins Icelandair.  Það er óhætt að segja að tíðindin sem stjórnarformaður Flugleiða, Hannes Smárason, flutti starfsmönnum nú síðdegis hafi komið mörgum á óvart, þ.e. tilkynning um ráðningu Ragnhildar í forstjórastarfið. Ragnhildur er 33 ára verkfræðingur en hún hefur starfað hjá Flugleiðum í sex ár, þar af sem framkvæmastjóri rekstrarstýringar síðustu þrjú ár. Hún kvaðst vera hálf orðlaus yfir þessu og þakkaði stjórninni það traust sem henni sé sýnt. Hinn nýráðni forstjóri sagðist taka við einstaklega góðu búi úr höndum Sigurðar Helgasonar, fráfarandi forstjóra. Sigurður lýsti yfir ánægju með að það þurfi tvo til að taka við af sér. Þau Ragnhildur og Jón Karl munu starfa með Sigurði þar til hann lætur af störfum þann 1. júní næstkomandi. Aðspurð hvort Íslendingum eigi ekki eftir að finnast skrítið að þurfa að venjast því að 33 ára stúlka sé komin í forstjórastólinn hjá Flugleiðum segist Ragnhildur ekki eiga von á því. „Ég hef aldrei upplifað það í mínu lífi að það skipti einhverju máli hvort maður sé karlkyns eða kvenkyns. Ég held að tímarnir séu bara breyttir,“ segir Ragnhildur.