Kærði nauðgun í Bolungarvík

Lögreglan í Bolungarvík rannsakar nauðgun sem sextán ára stúlka kærði um miðjan mánuðinn. Enginn hefur verið handtekinn vegna málsins og enginn er grunaður. Lögreglan leitar enn upplýsinga. Nauðgunin átti sér stað föstudaginn 12. ágúst á salerni á veitingastaðnum Víkurbæ í Bolungarvík, en þar var haldinn unglingadansleikur. Stúlkan tilkynnti lögreglu um nauðgunina um nóttina og var hún færð til skoðunar á Heilbrigðisstofnun Ísafjarðar. Að sögn Gylfa Þórs Gíslasonar varðstjóra hjá lögreglunni í Bolungarvík voru áverkar á stúlkunni sem komu í ljós við skoðun. Búið er að yfirheyra fjölda manns sem á staðnum voru þegar nauðgunin átti sér stað, en alls voru 90 gestir og starfsmenn á dansleiknum. Gylfi segir að málsatvik séu enn óljós og biður lögreglan alla þá sem kunna að hafa verið á umræddum dansleik eða búa yfir upplýsingum um málið og ekki hefur verið haft samband við að snúa sér til lögreglunnar í Bolungarvík í síma 456-7111.