Gaf 1,2 milljónir dollara í Katrínarsjóðinn

Framherjinn Kevin Garnett hjá Minnesota Timberwolves var heldur betur rausnarlegur fyrir helgina, þegar hann gaf sérstökum styrktarsjóði fórnarlamba fellibylsins Katrínar 1,2 milljónir dollara úr eigin vasa, eða rúmar 70 milljónir íslenskra króna.

Peningarnir fara til uppbyggingar húsnæðis fyrir þá sem verst urðu úti í náttúruhamförunum á dögunum. Garnett gaf féð í sérstakan sjóð sem spjallþáttarstjórnandinn Oprah Winfrey hjálpaði að koma á laggirnar og sagði ástæðu gjafmildi sinnar hafa verið þá staðreynd að hann hefði verið fullviss um að peningarnir færu óskiptir til góðs málefnis.