Tveir skornir með sveðju

Fjórir átján ára piltar eru í haldi lögreglu eftir að hafa ráðist á tvo menn á tvítugsaldri með sveðju eða hnífi í Garðabænum í nótt. Annar mannanna er alvarlega slasaður. Mennirnir voru í samkvæmi í heimahúsi í Garðabænum en ráðist var á mennina fyrir utan húsið í götunni um klukkan hálf fjögur í nótt. Samkvæmt upplýsingum lögreglunnar í Hafnarfirði virðist sem mennirnir hafi verið skornir með stórum hnífi eða sveðju og hlaut annar mannanna alvarlega áverka á höfði og höndum, en hann er auk þess höfuðkúpubrotinn. Hinn maðurinn er minna slasaður. Mennirnir fjórir voru handteknir á vettvangi í nótt en þeir eru allir góðkunningjar lögreglunnar í Hafnarfirði.