Ákærður fyrir nauðgun í Bretlandi

Íslenskur karlmaður á fertugsaldri bíður nú dóms í Englandi vegna nauðgunarákæru. Maðurinn mun, samkvæmt frétt vefmiðilsins Surrey Online, hafa átt kynmök við 15 ára stúlku en heldur því fram að hann hafi hvort tveggja talið hana eldri, auk þess sem hann haldi því fram að hún hafi veitt fullt samþykki fyrir kynmökunum og því hafi ekki verið um eiginlega nauðgun að ræða. Atburðurinn átti sér stað í lok maí á þessu ári í smábænum Hookwood og var fyrirtaka í málinu fyrir dómstólum í gær. Þrjú vitni eru sögð munu koma fyrir dóminn þegar réttað verður í málinu á næstu dögum. Maðurinn, sem búsettur er á Íslandi, hefur samkvæmt fregn breska vefmiðilisins haft annan fótinn í Bretlandi vegna vinnu. Hann hefur dvalist á Íslandi eftir að honum var sleppt lausum gegn tryggingu stuttu eftir atburðinn. Verði maðurinn fundinn sekur má hann búast við að þurfa að sitja nokkur ár í fangelsi.