Varar við lánafylleríi

Ráðgjafi hjá Fjármálum heimilanna varar við lánafylleríi í kjölfar nýrra íbúðalána viðskiptabankanna. Þá undrast hann að enn skuli bankarnir bjóða viðskiptavinum sínum verðtryggð neytendalán, og segir slíkt hvergi tíðkast nema hér á landi. Viðskiptabankarnir bjóða nú hver á fætur öðrum upp á lán til húsnæðiskaupa eða endurfjármögnunar eldri lána, með verðtryggðum 4, 4 prósenta nanfnvöxtum.Margir renna eflaust hýru auga til lánanna, sjá fyrir sér að með þeim sé hægt að greiða niður eldri lán og lækka í leiðinni yfirdráttinn. I ngólfur H. Ingólfsson, leiðbeinandi hjá Fjármálum Heimilanna ráðleggur fólki þó að skoða vel þá kosti sem í boði eru. Hann segir að það kosti um 3% af láninu að skuldbreyta því. Hann segir ekki ráðlegt að fara á lánafyllerí á þessum tíma. Hann segir heimilin í landinu vera að skuldsetja sig meira en þau hafi efni á. Ingólfur bendir einnig á að nafnvextir segi ekki nema hálfa söguna. Það sé verðtryggingin sem hækki greiðslubyrðina. Hann segir að ef tekið sé verðtryggt lán með 4,4 prósenta nafnvöxtum til 40 ára, greiði lántakandi lánið þrisvar sinnum upp. Ef lánið er hins vegar óverðtryggt með mun hærri nafnvöxtum, eða 7,45 prósent, eins og að minnsta kosti einn viðskiptabankanna býður upp á, sé endurgreiðslan nær helmingi lægri, ef miðað er við 2,5 prósenta verðbólgu. Ingólfur segir ástæðu þess að bankarnir bjóði nú hver á eftir öðrum upp á 4,4 % vexti í stað þess að bjóða óverðtryggð lán, að þeir græði mun meira á verðtryggingunni. Hann segir verðtrygginguna nokkurs konar felutryggingu og vilji menn helst ekki ræða hana. Hann telur að hún sé ekki annað en vaxtavextir. Það að bjóða almenn neytendalán með vaxtavöxtum segir Ingólfur að þekkist hvergi í veröldinni nema hér.