Madonna í söngvamynd

Söngkonan Madonna hefur landað hlutverki í söngvamyndinni Hello Sucker! sem verður framleidd af hinum virta leikstjóra Martin Scorsese. Fer hún með hlutverk þöglu kvikmyndastjörnunnar Texas Guinan og gerist myndin í villta vestrinu í Bandaríkjunum á þriðja áratugnum. Auk þess að leika í kvikmyndum var Guinan næturklúbbseigandi. Mótmælti hún harðlega áfengisbanni sem sett var á í landinu og lét yfirvöld fá það óþvegið. Madonna, sem hefur verið gagnrýnd harkalega fyrir frammistöðu sína í myndum á borð við Desperately Seeking Susan og Swept Away, fær nú enn eitt tækifærið til að láta ljós sitt skína. Hún verður einn af framleiðendum myndarinnar og mun jafnframt semja tónlistina. Leikstjóri verður Jeremy Scott og hefjast tökur á næsta ári. Rokkekkjan Courtney Love átti upphaflega að fara með hlutverk Guinan og samdi meira að segja nokkur lög fyrir myndina en var rekin vegna eiturlyfjavandamála sinna.