Voveiflegt mannslát í nótt

Tæplega þrítugur maður er í haldi lögreglunnar í Kópavogi, grunaður um að hafa ráðið tuttugu og fimm ára eiginkonu sinni bana á heimili þeirra í Hamraborg í nótt. Það var klukkan rúmlega þrjú í nótt sem lögreglu barst tilkynning um að ekki væri allt með felldu á heimili þeirra. Þegar að var komið var konan látin og voru áverkar á líkinu sem bentu til þess að átök hefðu átt sér stað og leitt til dauða hennar. Eiginmaðurinn var handtekinn á vettvangi og hefur hann viðurkennt að hafa átt þátt í láti konunnar. Rannsókn málsins er á frumstigi og því óljóst um málsatvik.