Vilja banna Fahrenheit 9/11

Samtök íhaldssamra Bandaríkjamanna vilja banna heimildarmynd Michaels Moore, Fahrenheit 9/11, í kvikmyndahúsum. Segja þeir að myndin sendi frá sér misvísandi skilaboð og sé ógeðsleg. Í myndinni er því haldið fram að tengsl séu á milli George Bush Bandaríkjaforseta og háttsettra fjölskyldna í Sádi Arabíu, þar á meðal fjölskyldu bin Laden sem stóð að hryðjuverkaárásunum á Bandaríkin 11. september 2001. Samtökin Move America Forward ætla að skrifa þúsundir kvörtunarbréfa vegna myndarinnar á meðan samtökin Citizens United ætla að gera sjónvarps- og blaðaauglýsingar þar sem skotið er föstum skotum að Moore. Fahrenheit 9/11, sem vann Gullpálmann á kvikmyndahátíðinni í Cannes í vor, verður frumsýnd í bandarískum kvikmyndahúsum 25. júní. "Moore hefur gagnrýnt hart þá atburði sem eiga sér stað og það er ekkert að því að gagnrýna. En þessi mynd er ekki heimildarmynd, hún er áróðursverk," sagði íhaldsmaðurinn Siobhan Guiney.