Endurálagning skatta send Baugi

Ríkisskattstjóri sendi stjórnendum Baugs í morgun endurálagningu skatta fyrir árið 1998 en það mál hefði ella fyrnst um áramótin. Árið 1998 voru Bónus og Hagkaup sameinuð í Baugi en eins og fram hefur komið munu skattayfirvöld ekki vera sátt við mat á fyrirtækjunum við þau tímamót. Indriði H. Þorláksson ríkisskattstjóri vildi ekkert tjá sig um málið, nema að hann hafi sent Baugi erindi í morgun. Hreinn Loftsson, stjórnarformaður Baugs, segir að málið væri svo nýkomið frá skattstjóra að ekki hafi unnist tími til að fara yfir það. Að svo stöddu vildi hann því ekki tjá sig um það.