Vilja efnisleg viðbrögð

Finnbogi Sigurðsson, formaður Félags grunnskólakennara, segir kennara orðna langeyga eftir efnislegum viðbrögðum samninganefndar sveitarfélaga við kröfum um styttingu kennsluskyldu og færslu launaflokka úr svokölluðum potti grunnlauna. Haft er eftir Finnboga á heimasíðu Kennarasambandsins að kennarar hafi margítrekað að þessar kröfur séu ófrávíkjanlegar og ekki verði hvikað frá þeim. Nýr fundur í kjaradeilu grunnskólakennara og sveitarfélaganna hefur verið boðaður hjá ríkissáttasemjara klukkan eitt í dag en lítið miðaði í samkomulagsátt á fjögurra klukkustunda löngum fundi í gær. Vinnudeilusjóður Kennarasambands Íslands hefur greitt út verkfallsbætur fyrir tímabilið 20. september til og með 3. október, eða alls fjórtán daga, en fullar bætur fyrir þennan tíma eru fjörutíu og tvö þúsund krónur.