Mortensen í næstu mynd Cronenbergs

Viggo Mortensen, sem lék Aragorn í Hringadróttinssögu, hefur tekið að sér aðalhlutverkið í myndinni A History of Violence í leikstjórn Davids Cronenberg. Cronenberg er þekktastur fyrir myndina The Fly og einnig hinar sérkennilegu Crash, Naked Lunch og eXistenZ. A History of Violence er byggð á samnefndri skáldsögu eftir John Wagner og fjallar um venjulegan fjölskyldumann sem kemur í veg fyrir rán og verður fyrir vikið áberandi í fjölmiðlum. Þar koma slæmir náungar auga á hann og grunar að hann sé fyrrverandi samstarfsmaður þeirra sem lét sig hverfa nokkrum árum áður. Þetta verður fyrsta mynd Cronenbergs síðan Spider kom út fyrir tveimur árum. Næsta mynd Mortensens á eftir þessari verður Alatriste í leikstjórn hins spænska Agustins Diaz Yanes. Fjallar hún um spænskan hermann sem gerist trúboði og lendir í framhaldinu í miklum átökum. Spænska leikkonan Elena Anaya leikur á móti Mortensen í myndinni.