Bandaríkjamenn vilja reisa 120 herbergja hótel við höfnina

Bandarísk hótelkeðja hefur áhuga á því að byggja 120 herbergja hótel við Ægisgarð við hliðina á Mýrargötureitnum. ABZ-A hefur fyrir hönd óstofnaðs hlutafélags sótt um lóð undir hótelið á þessum stað.

ABZ stendur fyrir arkitektana Arkís, Guðjón Bjarnason og Carlos Zapata. Egill Guðmundsson arkitekt hjá Arkís segir að hótel þetta gæti orðið mikil lyftistöng fyrir hafnarsvæðið og að framkvæmdin spili vel inn í aðrar framkvæmdir á svæðinu eins og t.d. tónlistarhúsið. Þá kom fram í máli hans að undirbúningur að þessu hafi staðið undanfarna sex mánuði.

Júlíus Vífill Ingvarsson formaður stjórnar Faxaflóahafna segir að það sé sérlega ánægjulegt að erlendir aðilar vilji koma hingað og fjárfesta eftir allt sem á undan er gengið í íslenku efnahagslífi.

„Við fögnum þessum áhuga og munum leggja okkar af mörkum til að framkvæmd þessi verði að veruleika,„ segir Júlíus Vífill. „Mér sýnist að hugmyndirnar sem þessir menn hafa séu prýðisgóðar en þarna er meðal annars gert ráð fyrir sundlaug við hótelið."

Hafnarstjórn samþykkti á fundi sínum á föstudag að óska eftir umsögn skipulagsráðs Reykjavíkur um erindið, en ljóst er að það hefur í för með sér breytingu á deiliskipulagi Mýrargötureits. Verði sú umsögn jákvæð er fallist á að ganga til viðræðna um málið enda verði þá gerð nánari grein fyrir fjármögnun, eignaraðild og framkvæmdatíma.