Fylgi haggast varla eftir at­kvæða­greiðslu

Rætt hefur verið um stöðu stjórnarflokkanna í ljósi niðurstöðu þjóðaratkvæðagreiðslunnar þar sem þjóðin hafnaði því að fara í aðildarviðræður við Evrópusambandið og hefur staða Viðreisnar, sem hefur sett Evrópumál á oddinn, sérstaklega verið nefnd. Samkvæmt nýrri könnun Maskínu virðist fylgishreyfingin afar lítil.

Í síðustu könnun Maskínu í ágúst mældust ríkisstjórnarflokkarnir þrír með samanlagt 42,9 prósenta fylgi. Staða þeirra styrkist örlítið á milli mánaða og stendur fylgið í 43,6 prósentum í septembermælingunni. 

Fylgi Samfylkingarinnar eykst um ríflega eitt prósentustig og mælist 27,5 prósent en á móti dregst fylgi Flokks fólksins saman um eitt prósentustig og mælist 4,3 prósent. Þá breytist fylgi Viðreisnar nær ekkert og stendur í 11,9 prósentum.

Sjálfstæðisflokkurinn mælist næst stærstur með tuttugu og fimm prósent og er fylgið óbreytt á milli kannnana. Þá haggast Miðflokkurinn ekki heldur og mælist með þrettán prósent. Framsókn mælist einnig á sama stað með 7,5 prósenta fylgi.

Þá eru ekki miklar breytingar á stöðu flokkanna þriggja sem standa utan þings. VG mælist með 4,5 prósenta fylgi, Píratar eru með ríflega þrjú prósent en fylgi Sósíalista dregst aðeins saman og stendur í þremur prósentum.

Septembermælingin byggir á þremur könnunum og alls tóku 4.544 afstöðu til flokks. Fyrsta könnunin fór fram 21. til 25. ágúst, önnur 27. til 28. ágúst og sú þriðja 8. til 14 september.