Vísar á­sökun um rógs­her­ferð al­farið á bug

Heiðar segir við mbl.is að skipulögð rógsherferð sé rekin gegn sér vegna málsins.

„Það er bara af og frá og ekkert til í því. Þetta er bara hefðbundið dómsmál sem fer sinn farveg og hefur sinn gang í réttarkerfinu og ég ætla ekki að flytja málið í fjölmiðlum,“ segir Einar Hugi Bjarnason, lögmaður Gavia Invest.

Gavia hefur höfðað skaðabótamál gegn Heiðari og félagi hans Úrsus vegna kaupa á 12,72 prósenta hlut Úrsus í Sýn sumarið 2022. Kaupverðið var nærri 2,2 milljarðar króna.

Tekjur af tengingum fyrir mæla Controlant

Einar segir svokallaðar IoT-tekjur vera þungamiðju málshöfðunarinnar. Önnur atriði málsins séu tæknilegs eðlis og ekki ástæða til að telja þau upp í fjölmiðlum.

IoT-tekjur eru greiðslur sem Sýn fær fyrir að tengja tæki við farsímakerfið. Í þessu tilviki komu tekjurnar frá samstarfi við Controlant.

Controlant notar mæla til að fylgjast með hitastigi og staðsetningu lyfjasendinga. Í mælunum eru SIM-kort frá Sýn sem flytja gögnin um farsímakerfið. Eftir því sem fleiri mælar voru teknir í notkun jukust tekjur Sýnar af tengingunum.

Umsvif Controlant jukust mikið í kórónuveirufaraldrinum þegar mælar fyrirtækisins voru meðal annars notaðir við flutning bóluefna. Umsvifin minnkuðu síðan þegar faraldrinum sleppti.

„Þessar IoT-tekjur voru mjög stór stoð í rekstrinum,“ segir Einar.

Tekjufall áður en kaupin voru gerð

Umbjóðandi hans telur að þegar hlutabréfaviðskiptin fóru fram hafi Heiðar vitað að verulegur samdráttur hefði orðið í tekjunum. Um innherjaupplýsingar hafi verið að ræða sem hann hafi ekki veitt kaupandanum.

Einar er spurður hvort Gavia hefði mátt gera ráð fyrir að tekjurnar myndu dragast saman þegar umsvif Controlant minnkuðu eftir faraldurinn.

„Mínum umbjóðendum var málið ekki ljóst fyrr en uppgjör Sýnar árið 2025 lá fyrir, að upplýsingum hefði verið haldið eftir við kaupin og tilkynning Sýnar til FME tali sínu máli um það.“

Hann segir þá hafa orðið opinbert að verulegt fall hefði orðið í IoT-tekjunum áður en kaupin voru gerð. Birting þeirra upplýsinga hafi verið kveikjan að málshöfðuninni.

Heiðar bendir á hæfismat Fjármálaeftirlitsins

Sýn upplýsti í morgun að félagið hefði í febrúar sent Fjármálaeftirliti Seðlabankans gögn um meðferð rekstrarupplýsinga árið 2022. Við skoðun eldri gagna hefði vaknað spurning um hvort uppfærð innri spá um IoT-tekjur hefði borist réttum aðilum innan félagsins.

Heiðar segir í samtali við Morgunblaðið að ekkert liggi fyrir um að meint brot hans hafi verið tilkynnt eftirlitinu. Hann bendir á að Fjármálaeftirlitið hafi metið hæfi hans gaumgæfilega vegna stjórnarformennsku hans í Íslandsbanka. Að mati Heiðars sé ólíklegt að ólokið mál er varði hann sé til meðferðar hjá eftirlitinu samhliða því að honum hafi verið treyst fyrir stjórnarformennsku í kerfislega mikilvægu fjármálafyrirtæki.

Vísir er í eigu Sýnar.