Samkeppniseftirlitið hugsi yfir verð­breytingum olíu­fé­laganna

Samkeppniseftirlitið hefur birt umræðuskjal um þróun eldsneytismarkaðar hér á landi og áhrif breytinga á opinberum gjöldum og virðisaukaskatti á eldsneyti. Skjalið byggir á ítarlegri gagnaöflun frá olíufélögum og greiningu Samkeppniseftirlitsins á þeim.

„Í gögnunum kemur fram að álagning á bensíni og dísel hefur hækkað verulega á síðustu árum og að verðmunur á Íslandi og öðrum Evrópuríkjum hafi aukist á síðustu árum. Jafnframt bendir greiningin til þess að fyrri ályktanir Samkeppniseftirlitsins um fákeppnisaðstæður og vísbendingar um þegjandi samhæfingu á eldsneytismarkaði eigi enn við,“ segir í fréttatilkynningu frá eftirlitinu.

Eftir að ný lög um virðisaukaskatt og samkeppnislög, sem fela í sér lækkun virðisaukaskatts á eldsneyti, voru samþykkt á Alþingi var Samkeppniseftirlitinu gert skylt að hafa eftirlit með því að lækkunin skili sér til neytenda.

Hækkuðu verðið rétt fyrir gildistöku

„Greiningin bendir meðal annars til verðhækkana hjá sumum olíufélögum rétt fyrir gildistöku skattalækkunarinnar og hækkandi álagningar eftir 1. maí,“ segir í tilkynningunni.

Eftirlitið óskað eftir frekari skýringum frá viðkomandi olíufélögum og mun síðan taka afstöðu til þess hvort tilefni sé til frekari aðgerða. 

„Þá bendir greiningin til þess að innlent eldsneytisverð hafi fylgt hækkunum á heimsmarkaðsverði betur en lækkunum þess. Að mati Samkeppniseftirlitsins gefur sú þróun, ásamt öðrum niðurstöðum umræðuskjalsins, tilefni til frekari rannsóknar á verðmyndun eldsneytis hér á landi.“

• Umræðuskjal_SamkeppniseftirlitsinsPDF5.9MB
  Sækja skjal

Samkeppniseftirlitið óskar eftir sjónarmiðum fyrirtækja, hagsmunaaðila og almennings. Einnig er óskað eftir ábendingum um möguleg brot á samkeppnislögum, aðrar samkeppnishindranir, hindranir af hálfu hins opinbera og hugmyndum að aðgerðum sem gætu stuðlað að virkari samkeppni og lægra eldsneytisverði.