Tóku rök fé­lagsins til greina og tvö­földuðu svo sektina

Neytendastofa úrskurðaði fyrst í málinu þann 24. janúar 2025. Í úrskurðinum kemur fram að Happyworld hafi ekki svarað ítrekuðum bréfum Neytendastofu. Svör bárust eftir að úrskurðað hafði verið og samþykkti Neytendastofa að taka málið upp á ný með andmæli fyrirtækisins til hliðsjónar.

Í svörum Happyworld sagði að félagið starfaði á sviði kennslu og byði eingöngu upp á kynningar- og kennsluflug. Félagið gæti ekki borið ábyrgð á því hvernig endursöluaðilar settu upp eða orðuðu auglýsingar.

Í endurúrskurði staðfestir Neytendastofa fyrri ákvörðun sína í málinu. Sýnt hafi verið fram á með gögnum að Happyworld hafi boðið upp á útsýnisflug, gegn gjaldi, á vélknúnu fisi. Neytendastofa bannaði Happyworld því að auglýsa útsýnisflug á fisi gegn gjaldi. Sekt sé lögð á félagið vegna viðskiptahátta þess sem séu óheimilir og óréttmætir.

Þá var upphæð sektarinnar tvöfölduð frá tvö hundruð upp í fjögur hundruð þúsund krónur.