Skall með höfuðið í gólfið og fékk heila­hristing

Eins og sjá má hér að neðan var Wembanyama að smjúga á milli varnarmanna Portland þegar hann missti jafnvægið og féll með höfuðið á undan sér í gólfið. Þar lá hann eftir grafkyrr og var svo nokkrar mínútur að jafna sig, áður en hann hljóp inn til búningsklefa.

Eftir leik staðfesti San Antonio að Frakkinn hefði fengið heilahristing og þar með taka við ákveðin skref samkvæmt reglum NBA, áður en Wembanyama má spila aftur. 

Hann má ekki taka fullan þátt að nýju fyrr en í fyrsta lagi 48 tímum eftir meiðslin, þarf að verða algjörlega einkennalaus og ná ákveðnum áföngum í endurhæfingu áður en hann má spila að nýju. Læknir verður svo að gefa grænt ljós í samráði við fulltrúa deildarinnar.

Ljóst er að um mikið áfall gæti verið að ræða fyrir San Antonio og Wembanyama sem á dögunum varð sá yngsti í sögunni til að verða valinn varnarmaður ársins, og sá eini sem fengið hefur fullt hús atkvæða.

Wembanyama skoraði 35 stig þegar Spurs unnu 111-98 í fyrsta leik einvígisins við Portland en staðan er núna jöfn, 1-1.

LeBron James kom Lakers í 2-0

Í einvígi LA Lakers við Houston Rockets eru Lakers hins vegar komnir í 2-0 eftir að hafa unnið 101-94 sigur í nótt.

LeBron James fór fyrir liði Lakers og skoraði 28 stig, tók átta fráköst og gaf sjö stoðsendingar. Annar reynslubolti, Kevin Durant, sneri aftur hjá Houston eftir að hafa misst af fyrsta leiknum og var stigahæstur liðsins með 23 stig. Hann tapaði boltanum hins vegar níu sinnum og skorað aðeins þrjú stig í seinni hálfleik.