Ópíóðar í vasa Woods sem segist hafa verið í símanum

Bandarískir fjölmiðlar hafa komist yfir lögregluskýrslu sem varðar bílslys Woods og kemur þar fram að hann hafi „svitnað verulega“ og hreyfingar hans „þreytulegar og hægar“ á meðan hann var yfirheyrður vegna málsins.

Woods var handtekinn á föstudaginn var sakaður um að keyra undir áhrifum. Hann velti bíl sínum eftir að hann klessti á annan bíl.

Hann stóðst áfengispróf á staðnum en neitaði að undirgangast þvagpróf til vegna gruns um að hann keyrði undir áhrifum annarra ólöglegra efna en áfengis.

Woods er sagður hafa haltrað og átt erfitt með að halda jafnvægi þegar hann var tekinn í próf eftir áreksturinn. Augu hans hafi verið rauðsprungin og augasteinar hans útvíkkaðir.

Þá kemur fram að tvær hydrocodone-töflur hafi fundist í buxnavasa hans. Hydrocodone er sterkt vanabindandi ópíóðaverkjalyf sem er notað við miðlungs til alvarlegum verkjum.

Woods hefur notað slík verkjalyf undanfarin ár vegna mikilla meiðsla en hann gekk til að mynda undir fjórar bakaðgerðir árin 2014 til 2017.

Woods ætlaði sér að taka þátt á Masters-mótinu sem fram fer í næstu viku en alls er óvíst hvort af því verði í ljósi fjórða bílslyss hans á undanförnum 17 árum. Sagan af hinum þremur voru dregin saman hér.