Stjórn vill greiða fimm­tán milljarða í arð

Í afkomutilkynningu kemur fram að hagnaður sem tilheyrir hluthöfum Arion banka hafi verið 6,2 milljarðar króna á fjórðungnum, samanborið við 8,3 milljarða króna á fjórða ársfjórðungi 2024. Arðsemi eigin fjár Arion banka nam 11,6 prósentum á fjórða ársfjórðungi 2025 og 14,9 prósentum á árinu 2025.

Arðsemi eiginfjár sem tilheyrir hluthöfum Arion banka var 11,6 prósent samkvæmt tilkynningunni, samanborið við 16,4 prósent á fjórða ársfjórðungi 2024. Hagnaður á hlut var 4,50 krónur, samanborið við 6,01 krónu 2024.

Í tilkynningu kemur einnig fram að hreinar þjónustutekjur námu 4,1 milljarði króna og að rekstur Varðar hafi skilað 1,1 milljarða króna hagnaði, samanborið við 1,7 milljarða á sama tíma árið áður.

Lán til viðskiptavina jukust

Kjarnatekjur, það er hreinar vaxta-, þóknana- og tryggingatekjur (án rekstrarkostnaðar tryggingastarfseminnar), jukust um 7,3 prósent í samanburði við 2024 og rekstrarkostnaður jókst um 1,8 prósent, sem samsvarar 157 milljónum króna í samanburði við fjórða ársfjórðung 2024.

Þá kemur einnig fram í tilkynningu að lán til viðskiptavina jukust um 27,3 milljarða króna eða 2,1 prósent á fjórðungnum, einkum lán til fyrirtækja.

„Starfsemi Arion-samstæðunnar gekk vel á árinu og var arðsemi eiginfjár umfram markmið. Tekjur af kjarnastarfsemi bankans voru í takt við væntingar og sem fyrr er góð afkoma drifin áfram af fjölbreytni þeirrar þjónustu sem við bjóðum viðskiptavinum. Eiginfjárhlutföll og lausafjárhlutföll eru vel umfram kröfur eftirlitsaðila og lögbundin lágmörk. Stjórn Arion mun gera það að tillögu sinni á aðalfundi þann 11. mars að greiddur verði arður sem nemur 11,5 krónum á hlut, sem samsvarar um 15 milljarða arðgreiðslu,“ segir Benedikt Gíslason bankastjóri Arion banka í tilkynningu.

Hann segir að á undanförnum árum hafi verið lögð áhersla á kerfisbreytingar á íslenskum fjármálamarkaði. Að styrkja þurfi kerfið og auka skilvirkni þess, hluthöfum og viðskiptavinum til góða.

Enn viðræður um sameiningu í gangi

„Með það að markmiði sóttist Arion eftir samrunaviðræðum við Kviku, fjórða stærsta banka landsins. Stjórnir félaganna samþykktu um mitt ár að ganga til samrunaviðræðna og standa nú yfir forviðræður við Samkeppniseftirlitið. Verði niðurstaða þeirra jákvæð þá verður formlegt erindi sent eftirlitinu,“ segir Benedikt.

Hann segir hátt vaxtastig og þráláta verðbólgu hafa sett svip sinn á árið og dregið úr eftirspurn einstaklinga eftir lánsfé.

„Ekki bætti dómur Hæstaréttar í október úr skák, þar sem vaxtabreytingarskilmáli óverðtryggðs láns Íslandsbanka var dæmdur ólögmætur að hluta. Í kjölfarið skertu margir lánveitendur, Arion banki þar á meðal, íbúðalánaframboð sitt. Í desember dæmdi Hæstiréttur hins vegar í máli gegn Arion banka, þar sem vaxtabreytingarskilmáli verðtryggðs íbúðaláns var dæmdur lögmætur.“

Hann segir að þrátt fyrir hátt vaxtastig hafi verið nokkur þróttur í íslensku hagkerfi og eftirspurn fyrirtækja eftir fjármögnun umtalsverð.

„Lán okkar til fyrirtækja jukust á árinu um 90 milljarða króna sem er með því mesta sem við höfum séð á einu ári.“

Framkvæmdir á árinu

Benedikt fjallar einnig um nýtt fríðindakerfi, lægri þóknanir vegna sjóðaviðskipta og átak bankans um fjárfestingar kvenna í tilkynningu sinni. Þá segir hann bankann síðustu ár hafa unnið að þróun tveggja stórra byggingarsvæða á höfuðborgarsvæðinu í samvinnu við sveitarfélögin sem þau tilheyra.

„Hefur markmiðið verið að upp rísi eftirsóknarverð hverfi sem styrkja nærumhverfið með góðri tengingu við aðliggjandi náttúru. Annað þessara verkefna kláraðist á árinu, Arnarlandið í Garðabæ, og nú er deiliskipulag fyrir fyrsta áfanga Blikastaðalandsins í samráðsferli. Við færumst því nær því að uppbygging geti hafist á Blikastaðalandi, einu stærsta óbyggða landsvæði höfuðborgarsvæðisins,“ segir hann að lokum.

Fram kemur í tilkynningu að fundur og vefstreymi fyrir markaðsaðila verði á morgun, 12. febrúar, klukkan 8:30. Nánari upplýsingar um afkomu bankans má finna hér.