Týndi gleðinni: „Þetta er mitt heimili“

Hilmar Smári samdi við Jonava í Litáen í haust en staða hans við Eystrasaltið var fljót að súrna. Hann fékk sig lausan frá félaginu í vikunni, kom heim í fyrradag og samdi við Stjörnuna í gær.

„Það var margt sem gekk á og það er kannski of löng saga til að fara yfir hérna. Ég er svo heppinn að vinna sem körfuboltamaður en ég var svolítið búinn að tapa gleðinni við að mæta á æfingar. En ég vissi að það er mikil gleði að spila fyrir Stjörnuna, ég fann það í fyrra,“ segir Hilmar um ástæðu heimkomunnar og segir enn fremur:

„Ég er kominn aftur til að líða vel, hafa gaman af körfunni. Ég veit það eru geggjaðir leikmenn hérna sem eru góðir vinir mínir og geggjað teymi. Þetta er svolítið mitt heimili svo fyrst ég var á leið heim vissi ég að ég kæmi hingað.“

Týndi gleðinni

Hvað erfiðleikana í Litáen varðar skýrir Hilmar það út sem svo:

„Þjálfarinn var látinn fara snemma, sem fékk mig út. Hlutverkið mitt minnkaði með tímanum og það voru fengnir inn leikmenn sem voru andstæðir við minn leikstíl. Ég fann ekki rytmann sem þú vilt finna körfuboltamaður og var ósáttur við mitt hlutverk,“

„Ég var kominn með svolítið nóg af því að vera ekki spenntur fyrir því á hverjum degi að mæta á æfingu og mig hlakkar til að finna það aftur hérna.“

Sagði takk en nei takk við önnur lið

Hilmar Smári kom heim í fyrradag og var fljótur að semja við Stjörnuna. Hann hittir þar fyrrum liðsfélaga og þjálfara sem hann vann með Íslandsmeistaratitil í fyrra. Baldur Þór Ragnarsson, þjálfari Stjörnunnar, sagði við Vísi í gær að hann hefði byggt lið Garðbæinga í kringum Hilmar áður en hann stökk til Litáen.

Hann ætti því að finna fjöl sína á ný í Garðabæ og segist ekki hafa heyrt í öðrum íslenskum liðum nema til þess eins að hafna þeim.

„Mjög stuttlega. Þetta var mjög fljótt að gerast. Það er mjög stutt síðan ég fékk mig undan samning þarna úti. Þá var Stjarnan fyrsta liðið sem ég heyrði í. Ég ræddi mjög stuttlega við aðra en það var í raun bara til að segja þeim að ég væri að fara hingað,“

„Með fullri virðingu öllum öðrum klúbbum á landinu vildi ég vera hér. Mér líður vel í kerfinu hans Baldurs og þessari menningu hér í Garðabæ. Ég fann heimili mitt hér á síðasta tímabili og það er gott að koma heim,“ segir Hilmar.

Titilvörn það eina sem er í boði

Markmiðið er þá skýrt. Hilmar Smári hyggst verja Íslandsmeistaratitilinn með félögum sínum.

„Algjörlega. Stjarnan er þannig klúbbur og kominn á þann stað að þetta er þeirra eina markmið og hefur verið í langan tíma. Ég held að þeir taki ekki inn leikmenn sem stefna lægra en það. Ef það er einhver sem tók þátt í þessari gleði sem var í fyrra hjá okkur, þá vita allir að við stefnum á það aftur. Þetta er ástæðan fyrir því að maður er í þessum íþróttum til að byrja með. Að verja þennan stóra er 100 prósent markmiðið,“ segir Hilmar.

Fleira kemur fram í viðtalinu við Hilmar sem má sjá í heild í spilaranum að neðan.