Fólk vari sig á svikurum á til­boðs­dögum

Í dag, ellefta nóvember, er svokallaður Dagur hinna einstæðu, eða Singles' day. Dagurinn er fyrsti stóri afsláttardagurinn í aðdraganda jóla og fjöldi verslana með ýmis konar tilboð og afslætti.

Á hverju ári koma upp mál þar sem fyrirtæki hækka verð á vörum skömmu fyrir dag hinna einstæðu. Þegar afslátturinn er svo kominn á er tilboðið í raun ekki jafn gott og það lítur út fyrir að vera.

Fylgjast vel með

Matthildur Sveinsdóttir, yfirlögfræðingur Neytendastofu, segir mikilvægt að neytendur séu vel vakandi.

„Það er mjög gott fyrir neytendur að vera meðvitaðir og vera mögulega búnir að fylgjast með í smá tíma á undan og horfa á verðið. Hvort það sé þá sannarlega verðlækkun og láta Neytendastofu vita ef þeir verða varir við eitthvað sem er ekki eins og það á að vera,“ segir Matthildur. 

Ábendingar í morgunsárið

Nokkrar ábendingar bárust Neytendastofu í morgun og búist er við fleirum í dag.

„Í sumum tilvikum á þetta sér eðlilegar skýringar og það er ekki tilefni til að gera neitt frekar. En í öðrum tilvikum þarf kannski að leiðbeina seljendum aðeins betur um reglurnar eða gera athugasemdir. En við fáum mjög margar ábendingar og við erum mjög þakklát fyrir það. Það er ómögulegt fyrir okkur að fylgjast með öllum mörkuðum þannig neytendur eru mjög mikilvægur liður í þessu eftirliti hjá okkur,“ segir Matthildur. 

Með aukinni netverslun skapast nýjar hættur. Dæmi eru um að fólk versli á svikasíðum og fái aldrei afhenta vöruna sem það verslaði.

„Þannig í viðskiptum á þessum dögum, alveg eins og almennt þegar verslað er á netinu, er mjög mikilvægt að neytendur kynni sér seljandann og viti við hvern þeir eru að eiga viðskipti. Ef það vantar upplýsingar um seljandann, það eru ekki trúverðugar upplýsingar, tilboðið virkar of gott til að vera satt. Það eru rauð flögg sem þarf að fylgjast mjög vel með,“ segir Matthildur. 

Ekki versla of mikið

Á svona dögum verði einnig að huga að umhverfinu.

„Hugsa aðeins út í það að það græðir enginn á því að kaupa vöru bara því hún er á miklum afslætti, ef þú hefur engin not fyrir hana,“ segir Matthildur.