Icelandair hleypur í skarðið fyrir Play

Í fréttatilkynningu frá Icelandair segir að Faro sé höfuðborg Algarve og syðsta borg Portúgals. Algarve héraðið sé þekkt fyrir fallegar strendur, golfvelli og ríkulega menningu.

Til að byrja með verði flogið tvisvar í viku, á mánudögum og föstudögum til 11. maí, en frá 16. maí verði flogið einu sinni í viku, á laugardögum. Icelandair Vita hafi áður boðið upp á skipulagðar ferðir í leiguflugi til Faro en með breytingunni muni úrval skipulagðra ferða aukast, sérstaklega golfferða.

Auk þess að bæta Faro við leiðakerfið hafi félagið aukið tíðni til vinsælla áfangastaða í Suður-Evrópu á borð við Tenerife, Las Palmas, Alicante og Barcelona. Einnig hafi flug verið aukið til lykiláfangastaða eins og Kaupmannahafnar og Parísar.

„Við sjáum mikla eftirspurn eftir áfangastöðum í Suður-Evrópu og viljum efla tengingar okkar þangað. Faro er spennandi áfangastaður sem margir Íslendingar þekkja, og við erum ánægð að geta boðið upp á flug þangað frá næsta vori. Með þessari viðbót og aukinni tíðni til annarra vinsælla áfangastaða styrkjum við leiðakerfið og bætum enn frekar við ferðum til sólríkra áfangastaða,“ er haft eftir Boga Nils Bogasyni, forstjóra Icelandair.