Búinn að fá sig full­saddan af þjónustunni hjá Wolt

Wolt hóf starfsemi sína á Íslandi árið 2023 en fyrirtækið starfar úti um allan heim. Í grunninn gengur þjónustan út á heimsendingarþjónustu í samstarfi við veitingastaði og verslanir.

Vantaði hálfa pöntun

Lárus Sigurður Lárusson lögmaður lýsir sér sem stórnotanda Wolt undanfarin tvö ár. Bæði hafi verið um að ræða persónulegar pantanir heim að dyrum en líka fyrir starfsfólk lögmannsstofunnar þar sem hann starfar.

„Í fyrradag vorum við að panta mat frá Hananum. Máltíð með sósum og drykkjum. Svo pöntum við einhverja aukadrykki, sósur og fleira. Svo kom ekki einu sinni helmingurinn af pöntuninni,“ segir Lárus.

Nær allar sendingar gangi vel

Christian Kamhaug, upplýsingafulltrúi Wolt fyrir Noreg og Ísland, segir þetta ekki vera dæmi um þá þjónustu sem þau vilji bjóða upp á og hann vilji persónulega biðja Lárus afsökunar. Þá ætli Wolt leysa málið með honum eins fljótt og auðið er.

Kamhaug segir í svari til fréttastofu að Wolt á Íslandi afgreiði nokkur þúsund sendingar á hverjum degi og 99,9 prósent þeirra skili sér á áfangastað án nokkurra vandræða. 

„En því miður gerist það stundum, líkt og í þessum tilvikum, að eitthvað kemur upp á og sendingin mætir ekki kröfum okkar. Við biðjumst afsökunar á þessu.“

Tjáð að sendlarnir séu svangir í vinnunni

Langtímanotandinn Lárus man tímana tvenna af samskiptum við Wolt. Nú sé það þannig að ekki sé gefið upp neitt símanúmer heldur sé aðeins hægt að senda erindi í gegnum netspjall. Þá var áður hægt að ná samtali við einhvern á Íslandi þar sem brugðist var greiðlega við athugasemdum.

„Nú virðist það vera hætt og þú ferð í netspjall og ferð á alþjóðlegt þjónustuborð, guð má vita hvar í heiminum. Þau senda skilaboð á veitingastaðinn sem hefur 48 klukkustundir til að bregðast við. Þú bíður á meðan,“ segir Lárus.

Þau svör sem nú fáist snúi aðallega að því að sendlarnir séu svangir í vinnunni og taki mat úr töskunum.

Kamhaug hjá Wolt hvetur viðskiptavini til að hafa samband við þjónustuver fyrirtækisins ef eitthvað kemur upp á í tengslum við afhendingu eða matinn sjálfan. Þá reyni starfsfólk Wolt að leysa málin eins vel og það geti.  

Launin sögð skammarleg

Sviðstjóri og sérfræðingur hjá lögfræði- og vinnumarkaðsviði ASÍ hafa sagt sendlarisann slá met í ábyrgðar- og skeytingarleysi í máli tuttugu einstaklinga sem kærðir hafa verið fyrir að starfa hjá fyrirtækinu án atvinnuréttinda.

Auk þess séu laun þeirra skammarlega léleg.

Áðurnefndur upplýsingafulltrúi Wolt hefur hafnað athugasemdum ASÍ og sakað um rógburð.

„Ef við værum að borga svona lág laun fengjum við engar starfsumsóknir. Þvert á móti er vill fjöldi fólks vinna fyrir okkur,“ sagði Kamhaug í júní í fyrra. Sendlar fái að meðaltali 1.720 krónur fyrir hverja sendingu og í kringum 4.800 krónur á tímann. Þeir vinni að meðaltali áttatíu klukkustundir á mánuði.

Lárus segist hafa reynt að ræða við sendilinn sem mætti með matarsendinguna á miðvikudaginn, ganga aðeins á hann. Þá hafi sendillinn hvorki talað ensku né íslensku. Ekki sé langt síðan hann pantaði pítsu með Wolt. Þegar kassinn var opnaður vantaði pítsusneið í kassann eins og sjá má á mynd efst í fréttinni.

„Nú er mér nóg boðið,“ segir Lárus sem metur það svo að hann hafi nýtt sér þjónustuna í nokkur hundruð skipti.

Nokkrir vinir og kunningjar taka undir með Lárusi við færslu hans um málið á Facebook.

Fleiri langþreyttir

„Ég er fyrir löngu hættur. Málið er að sendlarnir éta af pöntuninni. Ég hef þetta staðfest frá veitingastöðum sem m.a. gerðu prufu á því eftir ítrekaðar athugasemdir. Wolt svarar engu!“ segir Sveinn Hjörtur Guðfinnsson.

Maríanna Rós Guðmundsdóttir hefur svipaða sögu að segja.

„Eftir að hafa séð Wolt-kassa notaða sem þvottakörfur og bíla stútfulla af fjölskyldum að gæða sér á matnum sem átti að berast viðskiptavinum, ákvað ég að nú væri nóg komið og hætti að eiga í viðskiptum við þá.“

Fréttin hefur verið uppfærð með svörum frá Wolt sem bárust eftir birtingu fréttarinnar.