SVEIT kærir dag­sektir Samkeppniseftirlitsins

Eins og fram kom í morgun hefur Samkeppniseftirlitið lagt dagsektir á SVEIT vegna meintra brota samtakanna á lagaskyldu til þess að afhenda eftirlitinu gögn. Dagsektirnar eru lagðar á til þess að knýja á um að SVEIT fari að samkeppnislögum og afhendi umkrafin gögn. SVEIT verði gert að greiða dagsektir að fjárhæð einni milljón króna á dag þar til umbeðin gögn hafa verið afhent Samkeppniseftirlitinu.

Telja málið ekki eiga heima á borði Samkeppniseftirlitsins

Málið snýr að rannsókn á ásökunum ASÍ, Eflingar og SGS um að Virðing sé gervistéttarfélag og stundi ólögmætt verðsamráð. Því hefur verið haldið fram að gerð SVEIT á einhliða kjarasamningi við félagið Virðingu þar sem kveðið væri á um launakjör á veitingamarkaði hafi farið gegn samkeppnislögum.

Samkeppniseftirlitið ákvað að hefja rannsókn og óskaði eftir gögnum frá SVEIT, tilteknum aðildarfyrirtækjum SVEIT og Virðingu. Gögn hafa borist frá Virðingu og þeim aðildarfyrirtækjum SVEIT sem gagnabeiðninni var beint til. SVEIT hefur hins vegar ítrekað hafnað kröfu Samkeppniseftirlitsins um afhendingu gagnanna.

SVEIT segist telja að málið eigi ekki heima á borði eftirlitsins. Þar að auki telur SVEIT að stéttarfélögin, þar með talið Efling, geti ekki átt aðild að málinu. Þetta kemur fram í tilkynningu frá Einari Bárðarsyni framkvæmdastjóra SVEIT.

Talað fyrir daufum eyrum stéttarfélaganna

Samkeppniseftirlitið hefur ekki fallist á þau sjónarmið SVEIT. Einar segir að í því felist að Efling fái nánast óheftan aðgang að málsgögnum á meðan rannsókninni stendur.

„SVEIT hefur lýst því yfir gagnvart Samkeppniseftirlitinu að umbeðin gögn verði afhent þegar fyrir liggur úrskurður áfrýjunarnefndar um að ákvæði samkeppnislaga geti átt við um gerð kjarasamninga og að stéttarfélögin eigi aðild að málinu. Ástæðan er að SVEIT hefur frá upphafi leitast við að eiga samtal við Eflingu til að vinna að endurbótum í starfsgreininni, en ávallt talað fyrir daufum eyrum. Efling hefur frekar kosið að reka öll mál í fjölmiðlum. SVEIT telur hins vegar að gögnin, sem óskað var eftir, eigi ekki heima hjá Eflingu. Því hefur SVEIT ákveðið að nýta rétt sinn til að leita afstöðu áfrýjunarnefndar um þessi atriði, áður en lengra er haldið,“ segir Einar.

Betri kjör en samningur Eflingar

Þá segir hann að SVEIT muni kæra dagsektir Samkeppniseftirlitsins og að SVEIT hafni því með öllu að hafa gert „gervikjarasamning“ við Virðingu.

„Samningurinn er að öllu leyti sambærilegur síðasta samningi MATVÍS og Samtaka atvinnulífsins, sem tryggir launafólki um margt betri kjör en samningur Eflingar gerir. Þess utan er öllum frjálst að vera í því stéttarfélagi sem viðkomandi kýs, enda er félagafrelsi tryggt með ákvæðum stjórnarskrár,“ segir Einar Bárðarson framkvæmdastjóri SVEIT.