Kjara­samningar Play og ÍFF í höfn

Innan Íslenska flugstéttarfélagsins, ÍFF, starfa félagsmenn einungis hjá Play og félagið semur þvert á stéttir flugfélagsins. Sérstaklega er samið við flugliða annars vegar og flugmenn hins vegar. Samningaviðræður hafa staðið yfir frá því á síðasta ári.

„Það er mikið fagnaðarefni að samningar til lengri tíma hafi náðst við ÍFF. Þessir samningar veita félagsmönnum kjarabætur en gera á sama tíma rekstur Play fyrirsjáanlegri. Það stefnir í mikið ferðasumar og við hjá Play munum kappkosta við að veita farþegum okkar gæða þjónustu og frábært úrval áfangastaða á lægra verði,“ er haft eftir Einari Erni Ólafssyni forstjóra í tilkynningu frá Play.

Samkvæmt umfjöllun Ríkisútvarpsins var kjaradeilunni vísað til ríkissáttasemjara í febrúar en sú beiðni var dregin til baka í kjölfarið á því að stórum hluta samninganefndarinnar var skipt út. Það hafi verið gert vegna þess að samningaviðræður hefðu staðið yfir lengi og að skipt hefði verið um nefndarmenn í þeirri von um að hlutirnir gengju betur fyrir sig. Er þetta haft eftir Kolbrúnu Maríu Einarsdóttur, formanni stjórnar flugliða hjá ÍFF.

Allir félagsmenn Íslenska flugstéttafélagsins eru eins og fyrr segir starfsmenn flugfélagsins Play og hefur félagið verið vænt um að vera svokallað gult stéttarfélag eða gervistéttarfélag. Halla Gunnarsdóttir sakaði félagið meðal annars um slíka starfsemi í síðasta mánuði. Félagið hafnar ásökununum.