Daníel Guðni tekur við karlaliði Kefla­víkur

„Daníel hefur verið viðloðandi þjálfun í meira en 20 ár þó ungur sé hann að árum og hefur víððtæka reynslu sem mun nýtast vel í starfi hér í Keflavík. Vinna er í fullum gangi í leikmannamálum og ekki hægt að útiloka að einhverjar fréttir berist í þeim málum innan skamms“ segir í tilkynningu Keflavíkur á Facebook.

Daníel er fæddur árið 1986 og hóf þjálfaraferilinn árið 2015 með kvennaliði Grindavíkur, sem hann stýrði í úrslitaleik bikarkeppninnar gegn Snæfelli og undanúrslit úrvalsdeildarinnar gegn Haukum.

Árið 2016 var hann ráðinn aðalþjálfari karlaliðs Njarðvíkur, náði ekki inn í úrslitakeppnina á sínu fyrsta tímabili, var síðan sópað burt af KR í fyrstu umferð á næsta tímabili, og lét af störfum í kjölfarið, árið 2018.

Tímabilið eftir sinnti hann aðstoðarþjálfarastörfum hjá karla- og kvennaliðum Grindavíkur. Hann var síðan ráðinn aðalþjálfari Grindavíkur árið 2019, leiddi liðið í bikarúrslitaleik árið 2020, en látinn fara þegar fimm leikir voru eftir af tímabilinu 2022.

Þá gerðist hann aðstoðarþjálfari Njarðvíkur, sem spilaði undir stjórn Benedikts Guðmundssonar. Þeir létu báðir af störfum í fyrra, eftir að Njarðvík datt út í úrslitakeppninni 2024.

Daníel er menntaður íþróttasálfræðingur með meistaragráðu frá háskólanum í Lundi í Svíþjóð og hefur undanfarin fjögur ár starfað hjá Sidekick Health í Kópavogi.

Fréttin hefur verið uppfærð.