Næst­stærsta gosið hingað til

Vísbendingar eru um að kvika streymi áfram af dýpi inn á söfnunarsvæðið undir Svartsengi en litlar breytingar eru á gosóróa.

Mælingar Veðurstofunnar á útstreymi í gær sýndu að um 64 – 71 kg/s af SO2 streymdu frá eldgosinu. Áfram mætti því gera ráð fyrir gasmengun næstu daga, og það ætti sérstaklega við á gönguleiðum við Fagradalsfjall nálægt gosstöðvunum.

Kvikan orðin 47 milljón rúmmetrar

Niðurstöður úr mælingum Náttúrufræðistofnunar í gær sýndu að hraunbreiðan sem myndast hefur í þessu gosi er orðin 9,1 ferkílómetrar að flatarmáli, og rúmmál hennar um 47 milljón rúmmetrar. Hraunbreiðan er að meðaltali rúmlega 5 metra þykk.

Eldgosið, sem hófst fyrir 9 dögum síðan, er þannig orðið það næststærsta að rúmmáli af þeim eldgosum sem hafa orðið á Sundhnúksgígaröðinni síðan í desember 2023.

Hraunbreiðan sem myndaðist í eldgosinu sem stóð í um 15 daga, frá 22. ágúst til 5. september, er sú stærsta að rúmmáli eða um 61 milljón m3 . Hraunbreiðan sem myndaðist í eldgosinu frá 29. maí til 22. júní er sú þriðja stærsta eða um 45 milljón m3.