Þrjú at­riði til að auka á sjálfs­öryggið okkar í vinnunni

Þannig getur gott sjálfstraust verið eitt verðmætasta verkfærið okkar í töskunni og því um að gera að nýta sér þau góðu ráð sem mælt er með, til að efla okkur á því sviði.

Því jú, öllum langar okkur að ganga sem best.

Hér eru þrjú atriði sem eru líkleg til að auka á sjálfsöryggið okkar.

Að horfa á styrkleikana okkar: Og efla þá

Innri gagnrýnisröddin okkar á það til að horfa frekar á það sem miður fer en það sem frábærlega gengur. Liður í því að efla sjálfsöryggið okkar felst hins vegar í því að fókusera á styrkleikana okkar.

Hverjir eru þeir? Í hverju felast þeir? Hvernig erum við að nýta þá?

Þegar við höfum svarað þessum spurningum, er líka um að gera að velta fyrir okkur hvort það séu einhverjar leiðir sem okkur finnst ákjósanlegar til að auka á þessa styrkleika okkar. Eitthvað sem við getum lært? Eða eru fleiri verkefni sem við getum sinnt og nýtt þá þessa styrkleika oftar og betur? Því reynsla kennir okkur líka sitthvað.

Haltu utan um áfangasigrana

Það er ekki nóg að vita nokkurn veginn hvernig okkur gengur. Ef ætlunin er að efla sjálfstraustið okkar er mjög mikilvægt að vera með góða yfirsýn yfir allt það sem gengur vel hjá okkur.

Góð leið til að tryggja þetta er að skrá allt niður og halda utan um það sérstaklega, sem gengur vel. Áfangasigrar þurfa svo sem ekki að vera stórir, til dæmis getur það verið ákveðinn áfangasigur að standa sig sérstaklega vel í samskiptum.

Við þurfum heldur ekki að skrá neitt niður í smáatriðum, heldur frekar að vera með punkta eða minnisblað, jafnvel í símanum, til að ná að halda utan um þessa áfangasigra og kortleggja þá.

Það sem hefst með þessu er ekki einungis ákveðið pepp fyrir sjálfið okkar heldur er þetta gott hjálpartæki til að minna okkur á hversu megnug við erum í raun.

Hvað segja aðrir um þig?

Loks er það að kalla eftir jákvæðri endurgjöf um okkur sjálf. Að fá góðan vin, maka, samstarfsfélaga, vinnuveitanda eða annan sem við treystum til að gefa okkur smá punkta um hvernig þau sjá okkur. Og þá að sjálfsögðu hverjir eru okkar helstu styrkleikar.

Í raun má ímynda sér að þarna séum við að óska eftir meðmælum frá einhverjum, þótt við séum ekki að sækja um starf neins staðar. Það er í góðu lagi að segja traustum vinum frá því að markmiðið sé að efla okkur. Sjálfsrækt er alltaf af hinu góða og ætti að vera eitthvað sem helst allir myndu temja sér.