Engar bætur vegna seinkunar vélar sem varð fyrir eldingu

Þetta er niðurstaða Samgöngustofu sem telur atvikið tilviljanakennt og óviðráðanlegt í eðli sínu og að ómögulegt sé fyrir flugrekendur að afstýra slíku. Afar erfitt eða ómögulegt sé að gera einhverskonar ráðstafanir til að koma í veg fyrir atvik líkt og eldingar og þegar fugl fer inn í hreyfil vélar.

Kvartendur áttu bókað far með flugi Play frá Keflavíkurflugvelli til Alicante þann 17. desember á síðasta ári þegar umrædd vél varð fyrir eldingu á leið sinni frá Kaupmannahöfn til Keflavíkur. Sömu vél átti að nota í Alecante-flugi kvartenda. 

Eftir lendingu í Keflavík var vélin látin undirgangast tæknilega skoðun og reglubundið eftirlit líkt og nauðsynlegt er áður en vélinni er flogið aftur, til að tryggja að ekki stafi öryggishætta af notkun vélarinnar. Ákvörðun var tekin um að aflýsa fluginu til Alicante vegna þessa.

Kvartendur fóru fram á staðlaðar skaðabætur og endurgreiðslur á grundvelli reglugerðar sem tekur á aðstoð og bætur til handa farþegum sem neitað er um far eða þegar flugi er aflýst eða mikil seinkun verður.

Í skýringum Play sagði seinka hafi þurft fluginu um sólarhring vegna eldingarinnar sem flugvélin varð fyrir í lendingu á fyrri fluglegg sínum og veðri sem skall á í kjölfarið.

Það var niðurstaða Samgöngustofu að Play hafi fært fram nægjanleg gögn og röksemdir til að sýna fram á að aflýsingu umrædds flugs hafi mátt rekja til óviðráðanlegra aðstæðna. Því hafi ekki verið um bótaskylda aflýsingu að ræða.